Италияда Рим, Париж ва Лондонда террор уюштирмоқчи бўлганлар қўлга олинди

Италия ҳукумати мамлакатда террор ҳаракатларини режалаштирган икки нафар афғонистонлик ва бир нафар покистонлик қўлга олинганини маълум қилди.

Расмий хабарда айтилишича, қўлга олинганлар Италиядан ташқари Британия ва Францияда ҳам террор ҳужумлари уюштиришни режалаштирган.

Прокурор Роберто Росси қўлга олинганлар террор ҳужумларини амалга оширишлари аниқ бўлгани юзасидан ҳеч қандай исботлар йўқлигини айтди. Бироқ прокурорга кўра, қўлга олинган Ҳаким Носирий, Гулистон Ахмадзай, Зулфиқор Амджад халқаро террорчилик ва ноқонуний миграцияга кўмаклашишда гумон қилинмоқда.

Қўлга олинганларнинг телефонларидан, мусодара қилинган видео ва фото меатериаллардан келиб чиқиб, терговчилар Бари, Рим, Париж ва Лондонда террор ҳужумлари режалаштирилган, деган хулосага келган.

Тожикистонда қамоқда бўлган 11 нафар қирғизистонлик ватанига қайтарилди

Тожикистонда қамоқда бўлган 11 қирғизистонлик ватанига қайтарилди. Бу маълумотни собиқ маҳбуслардан бири – 2021 йил 24 октябридан бери Хўжанддаги тергов изоляторида сақланган Айдарбек Ҳайдаров Озодликнинг қирғиз хизматига тасдиқлаган.

Ҳайдаровга кўра, у билан яна 10 нафар фуқаро Қирғизистон томонига берилган. Тожик томони уларни Боткен вилоятидаги “Қизил Бел” назорат-ўтиш масканида қўшни давлат ҳуқуқ-тартибот идораларига топширган.

Ҳайдаровнинг отаси собиқ маҳбусларнинг барчаси соғ-саломатлиги, улардан олти нафари Лайлак туманининг Жанижер қишлоғи милиция бўлинмасига, қолганлари эса Бишкекка олиб кетилганини айтган.

11 нафар қирғизистонлик фуқаро турли йилларда “чегарани ноқонуний кесиб ўтиш”да гумон қилиниб, Тожикистон расмий идоралари томонидан ушланган.

Қирғизистон расмийлари воқеа юзасидан изоҳ беришганича йўқ.

Аввалроқ Қирғизистон президентининг Боткен вилоятидаги вакили Абдикарим Алимбаев Қирғизистон ва Тожикистон бир-бирининг қўлида ҳибсда бўлган ўз фуқароларини айирбошлаш жараёнини бошлаганини билдирган. 3 июнь куни Лайлак тумани суди ҳибсда бўлган 11 тожикистонликни ҳар бирига 50 минг сўмдан (тақрибан 600 АҚШ доллари) жарима солгач, озод қилган.

Апрель ойида Қирғизистон Бош прокуратураси Тожикистон қамоқхоналарида 13 нафар қирғизистонлик жазо муддатини ўтаётганини, улардан иккитаси умрбодга қамалганини маълум қилган.

Февраль ойи ўрталарида билдирилишича, 2021 йили Тожикистонда 39 нафар қирғизистонлик фуқаро чегарани ноқонуний кесиб ўтиш чоғида қўлга олиниб, турли муддатларга озодликдан маҳрум этилган.

Суриштирув: Россия украин ғалласини Қрим орқали олиб чиқиб кетмоқда

Россия Украинада тортиб олинган озиқ-овқат маҳсулотларини аннексия қилинган Қримга олиб кетяпти, у ердан эса асосан бошқа мамлакатларга тегишли кемаларда Туркия, Миср ва Сурияга ташимоқда. “Схеми” дастури (“Озодлик” радиоси лойиҳаси), Би-би-си ва Reuters суриштирувчилари ана шундай хулосага келишган, дея хабар қилди “Настояшчее Время”.

Украина расмийлари Россияни уруш чоғида ишғол қилинган ҳудудлардан камида 400 минг тонна ғалла ўғирлаганликда айбламоқда. Россия эса бунга доир барча айбловни рад этиб келади.

“Схеми” журналистларининг аниқлашича, украин ғалласи Қримда Севастополдаги “Авлита” портидан кемаларга ортилади. “Қрим портига киришда кемалардаги радарларни ўчириб қўйишяпти, шу боис уларни мониторинг тизими орқали кузатиш имконсиз. Аммо қуруқ юк ташийдиган кемалар сунъий йўлдошдан “яширина олмайди”, уларнинг портга киргани ва юк олгани космосдан қайд этилмоқда”, дейилган суриштирувда.

Журналистлар бу йил Қримдан ўтган йилгига нисбатан анча кўп ғалла жўнатилаётганини аниқлаганлар. Яриморолда бунча дон бўлиши мумкин эмас. “Ғалла юк машиналарида Украинанинг босиб олинган ҳудудларидан келтирилмоқда”, дея таъкидлашган суриштирувчилар.

Яриморолдан эса ғалла кемаларда ташилмоқда. Кемалар нафақат Севастополдан, балки Феодосия ва Керчдан ҳам жўнатиляпти. Украина прокурори Игорь Поночовний ҳам “ғалла ўғирлаб сотиш” шу тартибда йўлга қўйилганини айтган. Прокурорга кўра, бунақа кемаларда икки юк ҳужжатлари икки хил бўлади: ҳақиқий ва сохта ҳужжатлар.

БМТ ва халқаро ташкилотлар Россия босқини муносабати билан Украинадан ғалла ва бошқа озиқ-овқат маҳсулотларини денгиз орқали ташиш тўхтаб қолиши ривожланаётган мамлакатларда очарчиликка сабаб бўлиши мумкинлигидан хавотир билдириб келади.

Россия ташқи ишлар вазири танқидларга чидамай “Катта йигирмалик” йиғилишини тарк этди

Россия ташқи ишлар вазири Сергей Лавров танқидларга дош бера олмай “Катта йигирмалик” давлатлари дипломатлари йиғинини тарк этди.

8 июлдаги эрталабки йиғинда Германия ташқи ишлар вазири Анналена Бербок Россиянинг Украинага ҳужумини кескин қоралади. Ҳамкасби нутқ сўзлаётган пайтда Сергей Лавров йиғилиш залини тарк этди.

Тушдан кейинги йиғинда эса Украина ташқи ишлар вазири Дмитрий Кулеба нутқ сўзлаётган пайтда Лавров яна залдан чиқиб кетди.

Лавров бу ҳақда журналистларга изоҳ берар экан: “Бугун агрессор, босқинчи деган гапларни жуда кўп эшитдим”,-деб айтди.

Лавров “дипломатлар ўз нутқларида Россияни мисли кўрилмаган даражада танқид қилганлари”дан норози эканини билдирди.

8 июлда Индонезиянинг Бали шаҳрида ўтган “Катта йигирмалик” саммитининг асосий муҳокамаси Украинадаги уруш ва бунинг ортидан дунёда қаҳатчиликнинг авж олиши масаласи бўлди.

Айрим Ғарб давлатдари лидерлари Россияни Украинага уруш очгани учун “Катта йигирмалик”дан чиқаришни талаб қилмоқда. АҚШ ва унинг иттифоқчилари ташкилотнинг ноябрда ўтадиган саммитига Владимир Путин чақириладиган бўлса, бу йиғинни бойкот қилишларини билдирганлар.

Украина “Катта йигирмалик” аъзоси эмас. Бироқ Украина президенти Владимир Зеленский бу саммитга таклиф қилинган. Жаҳон иқтисодиётининг 80 фоизи ва дунё аҳолисининг учдан икки қисми “Катта йигирмалик”ка аъзо давлатлар ҳиссасига тўғри келади.

Покистондаги сув тошқини қурбонлари сони 45 кишига етди

Покистон ҳукумати Балужистон вилоятида жала оқибатида ҳалок бўлганлар сони 45 кишига етгани тўғрисида билдирди. Ҳукумат бу охирги рақам эмаслигини, қурбонлар сони бундан ҳам кўп бўлиши мумкинлигини маълум қилди.

Балужистон расмийси Аҳмад Носир 7 июль куни жала оқибатида юз берган сув тошқинлари оқибатида юзлаб уйлар вайронага айланганини, минглаб чорва нобуд бўлганини айтди.

Ҳукуматнинг билдиришича, Балужистонга сўнги 30 йилда илк маротаба бу қадар кучли ёмғир ёққан. Кучли ёмғир 5 июль куни Синд вилоятидаги конлардан бирини сув остида қолдирган. Бу конда ишлаётган кончилардан 7 нафари ҳалок бўлган.

Дастлаб Балужистон вилоятида 6 июлда юз берган сув тошқини оқибатида камида 18 киши қурбон бўлгани хабар қилинган эди. Покистонда ҳар йили жала оқибатида юз берадиган тошқинларда ўнлаб киши ҳалок бўлади.

ФИФА ва УЕФА собиқ президентлари товламачилик иши бўйича оқланди

Швейцария федерал суди Халқаро футбол федерацияси – ФИФА собиқ президенти Зепп Блаттер ва Европа футбол ассоциациялари иттифоқи – УЕФА собиқ президенти Мишел Платинини товламачилик иши бўйича оқлади. Мазкур иш доирасида улар икки миллион швейцар франки (икки миллион доллардан кўпроқ)ни ноқонуний ўзлаштирганликда ва ҳужжатларни сохталаштирганликда айбланган эди.

Тергов материалларида Блаттер Платинига ФИФАдаги фаолияти учун сохталаштирилган ҳужжат асосида ҳақ тўлагани иддао қилинган эди. Блаттер ҳам, Платини ҳам бу айбловни тан олган эмас.

Тергов бошланганидан сўнг Блаттер 2015 йилда, Платини эса 2016 йилда истеъфо беришга мажбур бўлганди. Бу икки шахсга дастлаб 8 йилга, кейин яна қўшимча равишда 6 йилга футбол соҳасида ишлаш ва футболга аралашиш тақиқланган.

Платини оқланганидан сўнг журналистларга: “Мен яна бир бор такрорлайман: мен адолатсизликка қарши курашдим. Мен биринчи матчнинг ғолиби бўлдим”,-деб билдирди.

Француз футболчиси Мишел Платини XX асрнинг афсонавий футболчиларидан бири сифатида тамсил этилади.

Зепп Блаттер эса ФИФАнинг саккизинчи президентидир. У 1998 йилдан 2015 йилгача, яъни 17 йил давомида ФИФАни бошқарган ва бу лавозимга 4 марта қайта сайланган.

Жонига суиқасд қилинган Япония собиқ Бош вазири касалхонада вафот этди

Япония собиқ бош вазири суиқасддан сўнг ўзига келмай, касалхонада жон берди. Бу ҳақда Япониянинг NHK телеканали хабар қилди.

Синдзо Абэ 8 июль куни эрталаб Нара шаҳридаги сайловолди чиқиши чоғида яраланган. Абэга орқасидан сочма ўқ отадиган қурол билан камида икки марта ўқ узилган. Маҳаллий турғунлардан бўлган 40 ёшли ҳужумчи Тэцуя Ямагами қўлга олинган. Маҳаллий матбуотнинг ёзишича, у Япония денгиз мудофааси собиқ аскари бўлган.

2006-2007 йиллар ҳамда 2012-2020 йилларда Япония ҳукуматини бошқарган Абэ мамлакат тарихида бош вазир лавозимида энг узоқ вақт ишлаган мулозим бўлиб ҳисобланади. У 2020 йилда бош вазирликдан кетиши сабабини соғлиғи ёмонлашгани билан изоҳлаган эди.

67 ёшли Синдзо Абэ айни пайтда ҳам Япониядаги ҳукумрон Либерал-демократик партиянинг энг нуфузли фигураларидан бири эди. Мазкур партияга Синдзо Абэнинг бобоси асос солган. Шундан сўнг партияга унинг отаси, кейинроқ ўзи раислик қилган.

Қирғизистоннинг Норинида ер талашганлар отган ўқдан олти киши яраланди

Норинда ер талашганлар ўртасида юз берган отишмада маҳаллий аҳолидан олти киши яралангани тўғрисида вилоят милицияси маълум қилди. Расман билдирилишича, 7 июль куни соат 11 лар чамасида Норин туманининг Хутор-Ак-Таала қишлоғида яшовчилардан бирининг уйини ўнлаб одам тошбўрон қилаётгани ва ўқ отилаётгани тўғрисида маълумот келиб тушган.

“30-40 киши ҳамқишлоғи К.Б., нинг уйи деразаларини ва дарвозасини тошбўрон қилган. Шундан кейин унга тегишли бўлган “Субару-Аутбек” автомашинасига ўт қўйишган. К.Б., уйидаги ўқотар қурол билан оломонга қарата ўқ узган. Натижада олти киши турли даражадаги жароҳатлар билан вилоят касалхонасига ётқизилган",-деб билдирди Норин вилоят милицияси.

Яраланганлардан уч нафарининг аҳволи оғир эканлиги, улар жарроҳлик амалиётидан ўтказилгани айтилди.

Маълум бўлишича, ер талашаётган қишлоқдошлар бир-бирларининг устиларидан ариза ёзиб, турли органларга мурожаат қилишган. Аммо бундан натижа бўлмагач, ер талашаётган томонлар ўзаро сўзлашиш учун йиғилган. Бу йиғилиш жанжалга айланиб кетган.

Айни пайтда мазкур воқеа юзасидан суриштирув ишлари олиб борилмоқда. Қишлоқда вазиятни барқарорлаштириш чора-тадбирлари кўрилмоқда.

Эрон президенти аёллар “ҳижоби ва иффати”га доир қонунни амалда қўллашни буюрди

Эрон президенти Иброҳим Раисийнинг мамлакатда ҳижоб ва иффат тўғрисидаги қонунни амалга киритишга доир буйруғи аёлларнинг кийиниши борасида янги чекловлар рўйхати пайдо бўлишига олиб келди.

Ҳукумат “ҳижобни нотўғри ўраш” деб атаётган ҳолатга қарши кураш доирасида, бутун Эрон бўйлаб 1400 дан ортиқ шуъбаларига эга “Миллат” банки аёл ходимларига баланд пошнали туфли ва тўрпайпоқ кийишни тақиқловчи фармойиш чиқарган. Фармойиш билан эркак менежерларга аёлларни маъмурий масалалар бўйича ёрдамчи қилиб олиш ҳам ман этилган.

Янги тартиб-қоидаларга кўра, 5 июлдан эътиборан банк ходималари сочларига қўшиб бўйин ва елкаларини ҳам рўмол билан тўсишлари лозим.

Шунингдек, Машҳад шаҳри прокуратураси шаҳар мэрига “ҳижобни нотўғри ўраган” аёлларга метродан фойдаланишни тақиқлашни сўраб мурожаат қилган. Мэр эса бунинг учун суд қарорини чиқартириш лозимлигини айтган.

Ҳукумат босимни кучайтираётганига жавобан бир неча фаол ижтимоий тармоқларда 12 июль куни аёлларни ҳижобсиз кўчаларга чиқишга чорлаб, кампания ташкил қилган.

1979 йилги Ислом инқилобидан сўнг Эронда аёлларнинг ва тўққиз ёшдан катта қизларнинг жамоат жойларида ҳижобда юриши мажбурий қилиб белгиланган эди.

Кўплаб эронлик аёллар узоқ йиллардан бери мазкур қоидага амал қилмай, расмий шахслар наздидаги “мақбул уст-бош”дан ўзгача кийинишга интилиб келишмоқда.

Путин: Россия Украинадаги махсус амалиётга ҳали жиддий киришгани йўқ

Россия Украинадаги махсус амалиёт чоғида ҳали жиддий хатти-ҳаракат қилганича йўқ, дея баёнот берди 7 июль куни Россия президенти Владимир Путин.

“Эшитишимизча, кимлардир бизни жанг майдонида енгмоқчи эмиш. Нима ҳам дердик, уриниб кўришсин. Ғарб биз билан охирги украин қолгунича уришмоқчи, деган гаплар кўп айтиляпти. Бу украин халқи учун фожиадир, бироқ, афтидан, вазият шунга қараб боряпти”, деган Путин Давлат думаси фракциялари раҳбарлари билан учрашувда.

Путинга кўра, Россия “умуман олганда, ишга ҳали жиддий киришмаган”ини ҳамма англаши керак. Айни пайтда, унинг айтишича, Москва сулҳ музокараларидан бош тортмайди.

“Лекин бугун музокарани рад этаётганлар билиб қўйсинларки, бу қанча узоқ чўзилса, биз билан келишишлари шунча қийин бўлади”, дея урғулаган Россия раҳбари.

Владимир Путин қонун чиқарувчилар билан учрашувда Россияга қарши санкциялар ташаббускорларининг мақсадлари ҳосил бўлмаганини таъкидлаган.

“Россияга нисбатан жорий этилган ноқонуний чоралар биз учун қийинчилик туғдирмоқда. Бу яққол кўриниб турган нарса. Бироқ Россияга қарши иқтисодий блицкриг ташаббусчилари умид қилганчалик оғир аҳволда эмасмиз”, деган Путин.

Киев Путиннинг Украинага доир янги баёнотларига Украина президенти офисининг маслаҳатчиси Михаил Подоляк муносабат билдирган.

“Коллектив Ғарб режаси” деган нарса йўқ. Шунчаки, муайян z-армия суверен Украина ҳудудига бостириб кириб, шаҳарларни ўққа тутмоқда ва тинч фуқароларни ўлдирмоқда, холос. Қолгани ҳаммаси – жўндан-жўн пропаганда. Бинобарин, жаноб Путиннинг “охирги украин қолгунича урушиш” ҳақидаги алжирашлари – Россия украин халқини қириб ташлашни режалаганига яна бир далилдир”, деб ёзган Подоляк.